ବିକାଶ ନାଁରେ ମାଳମାଳ ଯୋଜନା, ତଥାପି ମୌଳିକ ସୁବିଧାରୁ ବଞ୍ଚିତ ଅନେକ ଗାଁ: ଥୁଆମୁଳ, ରାମପୁର !!

କଳାହାଣ୍ଡି ଜିଲ୍ଲାର ଅନେକ ଦୁର୍ଗମ ଅଞ୍ଚଳବାସୀ ମୌଳିକ ସୁବିଧା ପାଇଁ ସଂଘର୍ଷ କରୁଥିବା ଚିତ୍ର ସାମ୍ନାକୁ ଆସୁଛି। ବିକାଶ ନାଁରେ ବିଭିନ୍ନ ଯୋଜନା ଘୋଷଣା ହେଉଥିଲେ ମଧ୍ୟ ଥୁଆମୁଳ ରାମପୁର ବ୍ଲକର ଅନେକ ଦୁର୍ଗମ ଗାଁରେ ରାସ୍ତା, ପାନୀୟ ଜଳ, ସ୍ୱାସ୍ଥ୍ୟ, ବିଦ୍ୟୁତ ଓ ଯୋଗାଯୋଗ ଭଳି ମୌଳିକ ସୁବିଧା ଏବେବି ଅପହଞ୍ଚ ଥିବା ନେଇ ଅଭିଯୋଗ ହେଉଛି।
ପାହାଡ଼, ପର୍ବତ ଓ ଘଞ୍ଚ ଜଙ୍ଗଲ ଘେରା ଏହି ଅଞ୍ଚଳର ଅନେକ ଗାଁକୁ ସବୁଦିନିଆ ଗମନାଗମନ ସୁବିଧା ନଥିବାରୁ ଜରୁରୀ ସମୟରେ ଆମ୍ବୁଲାନ୍ସ ପହଞ୍ଚିବା ମଧ୍ୟ କଷ୍ଟକର ହୋଇପଡୁଥିବା ସ୍ଥାନୀୟ ଲୋକେ କହୁଛନ୍ତି। ଫଳରେ ଗୁରୁତର ରୋଗୀ ଓ ଗର୍ଭବତୀ ମହିଳାଙ୍କୁ ଖଟିଆରେ ବୋହି ମୁଖ୍ୟ ରାସ୍ତା କିମ୍ବା ଡାକ୍ତରଖାନା ପର୍ଯ୍ୟନ୍ତ ନେବାକୁ ପଡୁଥିବା ଘଟଣା ସମୟ ସମୟରେ ସାମ୍ନାକୁ ଆସୁଛି। ନିକଟରେ ଜଣେ ଦାଦନ ଶ୍ରମିକଙ୍କୁ ପ୍ରାୟ ୮ କିଲୋମିଟର ଖଟିଆରେ ବୋହି ନେବା ଘଟଣା ମଧ୍ୟ ଅଞ୍ଚଳର ଦୁର୍ଗମ ଯୋଗାଯୋଗ ବ୍ୟବସ୍ଥାର ଚିତ୍ର ସ୍ପଷ୍ଟ କରିଥିଲା।
ସେହିପରି ଅନେକ ଗାଁରେ ବିଶୁଦ୍ଧ ପାନୀୟ ଜଳ ଏବେବି ଏକ ବଡ଼ ସମସ୍ୟା। କେତେକ ସ୍ଥାନରେ ଲୋକେ ଝରଣା ଜଳ ଉପରେ ନିର୍ଭରଶୀଳ ଥିବାରୁ ଜଳର ଗୁଣବତ୍ତା ଓ ସ୍ୱାସ୍ଥ୍ୟ ନେଇ ଚିନ୍ତା ପ୍ରକାଶ ପାଉଛି। ଜରୁରୀ ସ୍ୱାସ୍ଥ୍ୟସେବା ପାଇଁ ଦୁର୍ଗମ ଅଞ୍ଚଳର ଲୋକଙ୍କୁ ଦୂରସ୍ଥ ଡାକ୍ତରଖାନା ଉପରେ ନିର୍ଭର କରିବାକୁ ପଡୁଥିବାରୁ ଗରିବ ପରିବାରଙ୍କ ଉପରେ ଚିକିତ୍ସା ଖର୍ଚ୍ଚର ଚାପ ବଢୁଥିବା ଅଭିଯୋଗ ରହିଛି।
ଏପରିକି ମୃତଦେହ ବ୍ୟବଚ୍ଛେଦ ପାଇଁ ମଧ୍ୟ ପରିବାର ଲୋକଙ୍କୁ ଗୋଟିଏ ଡାକ୍ତରଖାନାରୁ ଅନ୍ୟ ଡାକ୍ତରଖାନାକୁ ଯିବାକୁ ପଡୁଥିବା ଅଭିଯୋଗ ରହିଛି। ଅଞ୍ଚଳରେ ଉପଯୁକ୍ତ ଶବ ବ୍ୟବଚ୍ଛେଦ ବ୍ୟବସ୍ଥାର ଅଭାବ ଏକ ଗୁରୁତର ପ୍ରଶ୍ନ ଭାବେ ଉଭା ହୋଇଛି।
ଅନ୍ୟପକ୍ଷରେ, କେତେକ ଗାଁରେ ବିଦ୍ୟୁତ ସେବା ଓ ମୋବାଇଲ ନେଟୱର୍କ ସମସ୍ୟା ମଧ୍ୟ ଲୋକଙ୍କ ଦୈନନ୍ଦିନ ଜୀବନକୁ ପ୍ରଭାବିତ କରୁଛି। ଡିଜିଟାଲ ଯୁଗରେ ଜରୁରୀ ଯୋଗାଯୋଗ ପାଇଁ ଲୋକଙ୍କୁ ପାହାଡ଼ ଉପରକୁ କିମ୍ବା ଗଛ ଉପରକୁ ଚଢ଼ି ମୋବାଇଲ ନେଟୱର୍କ ଖୋଜିବାକୁ ପଡୁଥିବା ଘଟଣା ଏଠାକାର ଯୋଗାଯୋଗ ବ୍ୟବସ୍ଥାର ଦୁର୍ବଳତାକୁ ପଦାକୁ ଆଣୁଛି।
ଶିକ୍ଷା କ୍ଷେତ୍ରରେ ମଧ୍ୟ ଚିତ୍ର ବିଶେଷ ଉନ୍ନତ ନୁହେଁ ବୋଲି ଅଭିଯୋଗ ହେଉଛି। କେତେକ ବିଦ୍ୟାଳୟରେ ଶିକ୍ଷକ-ଶିକ୍ଷୟିତ୍ରୀଙ୍କ ଅଭାବ ଥିବାବେଳେ ଅନ୍ୟ କେତେକ ସ୍ଥାନରେ ଛାତ୍ରଛାତ୍ରୀଙ୍କ ସଂଖ୍ୟା କମ୍ ରହିଛି। ବିଦ୍ୟାଳୟ ଥିଲେ ମଧ୍ୟ ସୁରକ୍ଷା ବାଡ଼, ପାନୀୟ ଜଳ ଓ ଆବଶ୍ୟକ ଭିତ୍ତିଭୂମିର ଅଭାବ ନେଇ ଅଭିଭାବକମାନେ ପ୍ରଶ୍ନ ଉଠାଇଛନ୍ତି।
ଥୁଆମୁଳ ରାମପୁର ବ୍ଲକରେ ୨୪ଟି ଗ୍ରାମପଞ୍ଚାୟତ ରହିଥିବା ବେଳେ ଏହା ଏକ ଆଦିବାସୀ ବହୁଳ ଓ ଦୁର୍ଗମ ଅଞ୍ଚଳ। ଏଠାକାର ଲୋକଙ୍କ ଜୀବନଯାପନରେ ଉନ୍ନତି ଆଣିବା ପାଇଁ ସରକାରଙ୍କ ପକ୍ଷରୁ ଅନେକ ଯୋଜନା ରହିଛି। ତେବେ ଯୋଜନାର ଘୋଷଣା ଓ ତାହାର ବାସ୍ତବ କାର୍ଯ୍ୟକାରିତା ମଧ୍ୟରେ ଯେପରି ବ୍ୟବଧାନ ନରହେ, ସେଥିପାଇଁ ନିରନ୍ତର ତଦାରଖ ଓ ଜବାବଦେହିତା ଆବଶ୍ୟକ ବୋଲି ମତ ପ୍ରକାଶ ପାଉଛି।
ସରକାରଙ୍କ ‘ବିକଶିତ ଗାଁ, ବିକଶିତ ଓଡ଼ିଶା’ ଭଳି ଲକ୍ଷ୍ୟ ଦୁର୍ଗମ ଅଞ୍ଚଳର ଶେଷ ଗାଁ ପର୍ଯ୍ୟନ୍ତ କେବେ ପହଞ୍ଚିବ, ତାହା ଏବେ ବଡ଼ ପ୍ରଶ୍ନ। ଯୋଜନା ଓ ପ୍ରତିଶ୍ରୁତି ସହିତ ମାଟିସ୍ତରରେ ଦୃଶ୍ୟମାନ ବିକାଶ ନହେଲେ ଏହାର ସୁଫଳ ପ୍ରକୃତ ହିତାଧିକାରୀଙ୍କ ପାଖରେ ପହଞ୍ଚିବ ନାହିଁ ବୋଲି ଅଞ୍ଚଳବାସୀ ମତ ଦେଇଛନ୍ତି।
ତେଣୁ ଥୁଆମୁଳ ରାମପୁରର ରାସ୍ତା, ପାନୀୟ ଜଳ, ସ୍ୱାସ୍ଥ୍ୟ, ବିଦ୍ୟୁତ, ନେଟୱର୍କ ଓ ଶିକ୍ଷା ଭଳି ମୌଳିକ ସମସ୍ୟାର ସ୍ଥାୟୀ ସମାଧାନ କେବେ ହେବ ଏବଂ ଦୁର୍ଗମ ଅଞ୍ଚଳବାସୀ କେବେ ବିକାଶର ସମାନ ସୁଫଳ ପାଇବେ—ତାହାକୁ ନେଇ ଏବେ ସବୁ ମହଲରେ ପ୍ରଶ୍ନ ଉଠିଛି।

ରିପୋର୍ଟ:- କବିରାଜ ଦୁର୍ଗା,କଳାହାଣ୍ଡି