ପାରାଦୀପ ବନ୍ଦରରୁ ଲୁହାପଥର ନେଇ ଚୀନ ଯାଉଥିବା ଏକ ମାଲବାହୀ ଜାହାଜ ଓଡ଼ିଶା ଉପକୂଳଠାରୁ ପ୍ରାୟ ୨୦୦ ନଟିକାଲ୍ ମାଇଲ୍ ଦୂରରେ ଯୋଗାଯୋଗ ବିଚ୍ଛିନ୍ନ ହେବା ପରେ ନିଖୋଜ ହୋଇଥିବା ଜଣାପଡ଼ିଛି। ପ୍ରାଥମିକ ସୂଚନା ଅନୁସାରେ, ଜାହାଜରେ ମୋଟ ୨୪ ଜଣ ସଦସ୍ୟ ଥିଲେ। ସେମାନଙ୍କ ମଧ୍ୟରେ ୨୦ ଜଣ ଚୀନ୍ ନାଗରିକ, ଜଣେ ବାଂଲାଦେଶୀ ଏବଂ ୩ ଜଣ ମିଆଁମାର ନାଗରିକ ଥିବା କୁହାଯାଉଛି। ତେବେ ଜାହାଜ ଓ ଏଥିରେ ଥିବା ୨୪ ଜଣ ସଦସ୍ୟଙ୍କ ବର୍ତ୍ତମାନ ସ୍ଥିତି ସଙ୍କଟାପର୍ଣ୍ଣ। ଜାହାଜର ନାମ, IMO ନମ୍ବର, ମୋଟ ସଦସ୍ୟ ସଂଖ୍ୟା ଏବଂ କେଉଁ ପରିସ୍ଥିତିରେ ଯୋଗାଯୋଗ ବିଚ୍ଛିନ୍ନ ହେଲା, ସେନେଇ ମଧ୍ୟ ଅଧିକାରୀକ ଭାବେ ସ୍ପଷ୍ଟ ସୂଚନା ମିଳିନାହିଁ। ଘଟଣା ପରେ ଭାରତୀୟ ତଟରକ୍ଷୀ ବାହିନୀ ଓ ନୌସେନା ପକ୍ଷରୁ ସନ୍ଧାନ ଓ ଉଦ୍ଧାର ଅଭିଯାନ ଆରମ୍ଭ କରାଯାଇଛି।
ପାରାଦୀପ ୟୁନିଟ୍ର ଭାରତୀୟ ତଟରକ୍ଷୀ ବାହିନୀର ଡେପୁଟି ଇନ୍ସପେକ୍ଟର ଜେନେରାଲ୍ ସଞ୍ଜୟ ନେଗୀ କହିଛନ୍ତି ଯେ ଆଣ୍ଡାମାନ ଓ ନିକୋବର ୟୁନିଟ୍ ପକ୍ଷରୁ ସନ୍ଧାନ ଓ ଉଦ୍ଧାର କାର୍ଯ୍ୟ କରାଯାଉଛି। ଉଦ୍ଧାରକାରୀ ଦଳ ରବିବାର ସକାଳ ସୁଦ୍ଧା ଘଟଣାସ୍ଥଳରେ ପହଞ୍ଚିବ ବୋଲି ସେ କହିଛନ୍ତି। ଏହାସହ ଘଟଣାସ୍ଥଳ ନିକଟରେ ଚଳାଚଳ କରୁଥିବା ଅନ୍ୟ ଜାହାଜଗୁଡ଼ିକୁ ମଧ୍ୟ ସତର୍କ କରାଯାଇଛି ଏବଂ ନିଖୋଜ ଜାହାଜ ଓ ଏଥିରେ ଥିବା କ୍ରୁଙ୍କୁ ଖୋଜିବାରେ ସହାୟତା କରିବାକୁ କୁହାଯାଇଛି। ଜାହାଜଟିର ପ୍ରକୃତ ସ୍ଥିତି ଓ ୨୪ ଜଣ କ୍ରୁ ସଦସ୍ୟଙ୍କ ସୁରକ୍ଷା ସମ୍ପର୍କରେ ଉଦ୍ଧାର ଅଭିଯାନ ପରେ ଅଧିକ ସ୍ପଷ୍ଟ ସୂଚନା ମିଳିପାରେ।
