ଓଡ଼ିଶା ଜନସେବା ଅଧିକାର ଆଇନ ୨୦୧୨ ଅନ୍ତର୍ଗତ ପ୍ରତ୍ୟେକ ସରକାରୀ ସେବା ସମ୍ପର୍କିତ ଅଭିଯୋଗର ସମାଧାନ ନ ହେଲେ ସ୍ବୟଂକୃତ ଭାବେ ତାହା ଉପରିସ୍ଥ ଅଧିକାରୀଙ୍କ ପାଖରେ ପହଞ୍ଚିବ। ସ୍ବତଃ ଆବେଦନ (ଅଟୋ ଅପିଲ୍) ବ୍ୟବସ୍ଥା ଅବହେଳା କରିଥିବା ଅଧିକାରୀଙ୍କୁ ଚିହ୍ନଟ କରିବା ସହିତ ଆବେଦନକାରୀଙ୍କୁ ଉଚିତ ସମୟରେ ସେବା ପ୍ରଦାନକୁ ସୁନିଶ୍ଚିତ କରିବ। ସେବା ପ୍ରଦାନରେ ଅବହେଳା କରିଥିବା କିମ୍ବା ଉପଯୁକ୍ତ କାରଣ ନ ଦର୍ଶାଇ ଆବେଦନକୁ ପକାଇ ରଖିଥିବା ଅଧିକାରୀଙ୍କ ଠାରୁ ପ୍ରତି ଦିନ ପିଛା ମୋଟା ଅଙ୍କର ଜୋରିମାନା ଆଦାୟ କରାଯିବ।
ଗତ ଏପ୍ରିଲ ମାସରେ ସଚିବସ୍ତରୀୟ ବୈଠକରେ ମୁଖ୍ୟ ସଚିବ କ୍ଷୋଭ ପ୍ରକାଶ କରିବା ସହ ସେବା ପ୍ରଦାନ ବ୍ୟବସ୍ଥାର ପୁନଃଅବଲୋକନ କରିବା ଏବଂ ବ୍ୟବସ୍ଥାରେ ଥିବା ତ୍ରୁଟିପୂର୍ଣ୍ଣ ତଥା ଅନାବଶ୍ୟକ ପ୍ରକ୍ରିୟାକୁ ବାଦ୍ ଦେବା ପାଇଁ କହିଥିଲେ। ଏହି କ୍ରମରେ ଅଟୋ ଅପିଲ୍ ବ୍ୟବସ୍ଥା କାର୍ଯ୍ୟକାରୀ ହୋଇଛି। ଯଦି ନିର୍ଦ୍ଧାରିତ ସମୟ ଭିତରେ ସରକାରୀ ସେବା ନ ମିଳିବା ନେଇ ଅଭିଯୋଗର ସମାଧାନ ହୋଇନାହିଁ, ତେବେ ତାହା ସ୍ବୟଂକୃତ ଭାବେ ସମ୍ପୃକ୍ତ ବିଭାଗର ଆପିଲେଟ୍ ଅଥରିଟିଙ୍କ ନିକଟରେ ପହଞ୍ଚିବ। ଏଥିରେ ସମ୍ପୃକ୍ତ ଆବେଦନକାରୀଙ୍କୁ କେବେ ସୁଦ୍ଧା ଓ କେଉଁ ସେବା ମିଳିବାର ଥିଲା, ବିଳମ୍ବର କାରଣ ଉଲ୍ଲେଖ ରହିବ। ଏଥିସହ ଆବେଦନକାରୀଙ୍କୁ ଏସ୍ଏମ୍ଏସ୍, ହ୍ବାଟ୍ସଆପ୍, ଇ-ମେଲ୍ ଜରିଆରେ ସୂଚନା ମିଳିବ। ଆପିଲେଟ୍ ଅଥିରିଟିଙ୍କ ଦ୍ବାରା ଧାର୍ଯ୍ୟ ସମୟ ଭିତରେ ସମସ୍ୟା ସମାଧାନ ନ ହେଲେ ସେହି ଅଭିଯୋଗ ଆଞ୍ଚଳିକ କର୍ତ୍ତୃପକ୍ଷ (ରିଭିଜିନାଲ ଅଥରିଟି)ଙ୍କ ନିକଟରେ ପହଞ୍ଚିବ ଏବଂ ସେ ଯଥାଶୀଘ୍ର ଚୂଡାନ୍ତ ନିଷ୍ପତ୍ତି ନେବେ। କେବେ ସୁଦ୍ଧା ତାଙ୍କୁ ସେବା ମିଳିବ କିମ୍ବା ତାଙ୍କ ଆବେଦନ କାହିଁକି ଖାରଜ କରାଯାଉଛି ତାହାର ପୂର୍ଣ୍ଣ ବିବରଣୀ ପ୍ରଦାନ ବାଧ୍ୟତାମୂଳକ ହେବ। ଶୁଣାଣି ସମୟରେ ଅନଲାଇନରେ ଅଭିଯୋଗକାରୀଙ୍କ ମତାମତ ଗ୍ରହଣ କରାଯିବ। ବୈଧ ମାମଲାରେ ପ୍ରତ୍ୟେକ ଦିନର ବିଳମ୍ବ ପାଇଁ ଦୈନିକ ୨୫୦ ଟଙ୍କା ଏବଂ କୌଣସି ଯୁକ୍ତିଯୁକ୍ତ କାରଣ ଦର୍ଶାଇ ନ ଥିଲେ ୫ ହଜାର ଟଙ୍କା ଜୋରିମାନା ସମ୍ପୃକ୍ତ ଅଧିକାରୀଙ୍କ ଠାରୁ ଆଦାୟ କରାଯିବ। ଏହି ପୂରା ପ୍ରକ୍ରିୟା ଉପରେ ବିଭାଗର ମନ୍ତ୍ରୀ ଓ ସଚିବ ବ୍ୟକ୍ତିଗତ ନଜର ରଖିପାରିବେ। ସରକାରୀ ସେବା ଧାର୍ଯ୍ୟ ସମୟ ଭିତରେ ପ୍ରଦାନ କରିବା ଲାଗି ଏସ୍ଓପିରେ ପ୍ରାବଧାନ ରହିଛି।
